ઉત્તરાખંડના હલ્દ્વાનીમાં ગુરૂવારે ભયાનક અકસ્માત બન્યો હતો. જયપુર બીસા ગામ પાસે એક ખાનગી શાળાની બસ બેકાબૂ બની નાળામાં ખાબકી હતી. બસમાં આશરે 40 વિદ્યાર્થીઓ સવાર હતા, જેમાંથી 12થી વધુ બાળકોને ગંભીર ઈજાઓ થઈ છે. ઈજાગ્રસ્ત વિદ્યાર્થીઓને તરત જ નજીકની હોસ્પિટલમાં ખસેડવામાં આવ્યા છે. બસના ડ્રાઈવર અને કંડક્ટરને પણ ગંભીર ઈજા પહોંચી છે.

સ્થાનિક લોકોએ ઘટનાસ્થળે પહોંચી તાત્કાલિક બચાવ કામગીરી હાથ ધરી હતી. બસનો કાચ તોડી વિદ્યાર્થીઓને સલામત બહાર કાઢવામાં આવ્યા. આ દુર્ઘટના બરેલી રોડ પર બની હતી, જ્યાં બસ રામપુર રોડ પરથી વિદ્યાર્થીઓને શાળાએ લઈ જઈ રહી હતી. સાઈડ લેવાની કોશિશ દરમિયાન બસ રોડ પરથી ઉતરીને નાળામાં ખાબકી હતી.

ગામના સરપંચ રમેશ ચંદ્ર જોષીએ આ અકસ્માત માટે બસ ડ્રાઈવરની બેદરકારીને જવાબદાર ઠેરવી હતી. તેમનો આરોપ છે કે, ડ્રાઈવર અવારનવાર નશાની હાલતમાં બસ ચલાવે છે. અગાઉ પણ આવી ઘટનાઓ બની ચૂકી છે, છતાં શાળાના વહીવટીતંત્રે કોઈ કડક પગલાં લીધા નથી. સદનસીબે, નાળામાં પાણી ન હોવાથી મોટા જાનહાનિથી બચી શકાયું.

સરપંચે જિલ્લા વહીવટીતંત્ર પર પણ નિશાન સાધ્યું અને કહ્યું કે, અકસ્માત બાદ પણ અધિકારીઓ સમયસર પહોંચ્યા ન હતા. સ્થાનિક લોકોએ પોતાના પ્રયાસોથી ઈજાગ્રસ્તોને હોસ્પિટલ પહોંચાડ્યા. આ ઘટનાના પગલે વાલીઓએ શાળામાં સુરક્ષા માપદંડોનો કડક અમલ કરાવવાની માગ કરી છે. પોલીસે અકસ્માતની તપાસ શરૂ કરી છે.