અમેરિકાના પૂર્વ પ્રમુખ ડોનાલ્ડ ટ્રમ્પને અપીલ કોર્ટે મોટો ઝટકો આપ્યો છે. કોર્ટ ઓફ અપીલ્સ ફોર ધ ફેડરલ સર્કિટે ટ્રમ્પ દ્વારા લાદવામાં આવેલા મોટા ભાગના ટેરિફને ગેરકાયદેસર જાહેર કર્યા છે. કોર્ટના મત અનુસાર રાષ્ટ્રપતિને ઈમરજન્સી દરમિયાન કેટલાક અધિકાર હોય છે, પરંતુ તેમને કર અથવા ટેરિફ લાદવાનો અધિકાર નથી.

રિપોર્ટ મુજબ, કોર્ટએ આ ટેરિફને 14 ઓક્ટોબર સુધી યથાવત રાખવાનો નિર્ણય કર્યો છે, જેથી ટ્રમ્પ વહીવટીતંત્રને સુપ્રીમ કોર્ટમાં અપીલ કરવાની તક મળી શકે. આ ચુકાદો ટ્રમ્પની આર્થિક નીતિઓ માટે મોટો ફટકો ગણાય છે.

બીજી તરફ, ડોનાલ્ડ ટ્રમ્પે આ નિર્ણયને સ્પષ્ટપણે નકારી કાઢ્યો અને જણાવ્યું કે તમામ ટેરિફ અમલમાં રહેશે. તેમણે આ ચુકાદાને “ખોટો અને પક્ષપાતી” ગણાવ્યો અને ચેતવણી આપી કે જો આ ટેરિફ દૂર કરવામાં આવશે તો તે અમેરિકાના અર્થતંત્ર માટે વિનાશકારી સાબિત થશે.

ટ્રમ્પે પોતાના સોશિયલ મીડિયા પ્લેટફોર્મ ટ્રુથ સોશિયલ પર લખ્યું: “બધા ટેરિફ હજી યથાવત છે. અપીલ કોર્ટે ખોટું કહ્યું છે કે ટેરિફ દૂર થવા જોઈએ, પરંતુ અમેરિકા અંતે જીતશે. જો ટેરિફ દૂર થશે તો તે દેશ માટે મોટી આફત બની જશે.”

હવે નજર સૌની સુપ્રીમ કોર્ટના આગામી નિર્ણય પર છે, જે ટ્રમ્પના રાજકીય ભવિષ્ય અને અમેરિકન અર્થતંત્ર પર સીધી અસર કરી શકે છે.