બિહાર વિધાનસભા ચૂંટણી પહેલાં રાષ્ટ્રીય જનતા દળ (RJD)ના નેતા અને પૂર્વ નાયબ મુખ્યમંત્રી તેજસ્વી યાદવ પર બે અલગ મતદાર ઓળખપત્ર (વોટર આઈડી) હોવાના આરોપો સામે આવ્યા છે. આ મુદ્દે ચૂંટણી પંચે તપાસ શરૂ કરી છે, જેના કારણે તેજસ્વીની મુશ્કેલી વધી ગઈ છે.

વિવાદ કેવી રીતે થયો?

વિવાદ ત્યારે શરૂ થયો જ્યારે તેજસ્વી યાદવે દાવો કર્યો કે તેમનું નામ સ્પેશિયલ ઇન્ટેન્સિવ રિવિઝન (SIR) હેઠળ બહાર પાડવામાં આવેલી ડ્રાફ્ટ મતદાર યાદીમાં નથી. તેમણે પ્રેસ કોન્ફરન્સમાં જણાવ્યું કે ચૂંટણી પંચની વેબસાઇટ પર તેમના EPIC નંબર RAB2916120થી સર્ચ કરતાં કોઈ રેકોર્ડ મળ્યો નથી. તેમણે આ ઘટનાને “લોકશાહી પર હુમલો” ગણાવ્યો અને કમિશન પર સવાલ ઉઠાવ્યા.

ચૂંટણી પંચનો જવાબ

ચૂંટણી પંચે તેજસ્વીના દાવાને ફગાવી દીધો અને જણાવ્યું કે તેમનું નામ મતદાન મથક નંબર 204, સીરીયલ નંબર 416 પર મતદાર યાદીમાં નોંધાયેલું છે. તેમનો માન્ય EPIC નંબર RAB0456228 છે, જેના આધારે તેમણે 2015 અને 2020ની વિધાનસભા ચૂંટણી લડી હતી. પંચના સૂત્રોએ જણાવ્યું કે તેજસ્વી દ્વારા દર્શાવાયેલો EPIC નંબર RAB2916120 છેલ્લા દસ વર્ષના રેકોર્ડમાં ક્યાંય નથી અને તેની સાચાઈ પર શંકા છે.

તપાસ અને રાજકીય પ્રતિક્રિયા

પંચને શંકા છે કે આ બીજો નંબર નકલી હોઈ શકે છે અથવા ગેરકાયદેસર રીતે બનાવવામાં આવ્યો હોઈ શકે છે. જો આ સાબિત થાય તો તે જનપ્રતિનિધિત્વ અધિનિયમ, 1951 હેઠળ ગંભીર ગુનો ગણાશે. પંચે આ મામલે સંપૂર્ણ તપાસ શરૂ કરી છે અને RJD કાર્યાલયમાંથી અન્ય નકલી મતદાર ID બનાવવામાં આવ્યા છે કે નહીં તે પણ તપાસી રહ્યું છે.

બીજી તરફ, બિહારના નાયબ મુખ્યમંત્રી સમ્રાટ ચૌધરી અને જેડીયુ પ્રવક્તા નીરજ કુમારે તેજસ્વી પર ચૂંટણી કૌભાંડનો આરોપ લગાવ્યો. ચૌધરીએ કહ્યું કે પ્રેસ કોન્ફરન્સમાં તેજસ્વીએ પોતે જ કૌભાંડનો ખુલાસો કર્યો છે અને તેની કડક તપાસ થવી જોઈએ. જેડીયુના નીરજ કુમારે આઈપીસીની કલમ 171F હેઠળ કેસ નોંધવાની અને તેજસ્વીના મતદાન અધિકારને હંગામી ધોરણે સસ્પેન્ડ કરવાની માંગ કરી છે.