રાજસ્થાનના જયપુરમાં સ્વતંત્રતા દિવસની સવારે એક ભયાનક હિટ એન્ડ રનની ઘટના સામે આવી છે. મળતી માહિતી અનુસાર, પૂર્વ આર્મી કેપ્ટન નરસારામ જાજડા સાઇકલથી ચિત્રકૂટ સ્ટેડિયમ તરફ જઈ રહ્યા હતા, ત્યારે પાછળથી પૂરપાટ ઝડપે આવી રહેલી કારે તેમને ટક્કર મારી. ટક્કર એટલી ગંભીર હતી કે નિવૃત્ત કેપ્ટનનું ઘટનાસ્થળે જ મોત નિપજ્યું.

આ સમગ્ર ઘટના સીસીટીવી કેમેરામાં કેદ થઈ છે. વીડિયોમાં સ્પષ્ટ દેખાય છે કે ટક્કર બાદ કાર પૂર્વ આર્મી અધિકારીને આશરે 10 ફૂટ સુધી ઢસડીને લઈ જાય છે, પરંતુ તેમ છતાં કાર રોકાતી નથી અને સ્થળેથી ભાગી જાય છે. ઘટનાના બાદ પોલીસ તાત્કાલિક ઘટનાસ્થળે પહોંચી હતી અને મૃતકનો મૃતદેહ પોસ્ટમોર્ટમ માટે હોસ્પિટલ ખસેડવામાં આવ્યો છે.

પોલીસે ઝડપી કાર્યવાહી કરીને કારચાલકને શોધી તેની ધરપકડ કરી લીધી છે. હાલમાં પોલીસ વધુ તપાસ કરી રહી છે અને અકસ્માતના કારણોની વિગત બહાર આવવાની બાકી છે.