યુક્રેનના રાષ્ટ્રપતિ વોલોડિમિર ઝેલેન્સ્કી અમેરિકાના રાષ્ટ્રપતિ ડોનાલ્ડ ટ્રમ્પ સાથે મુલાકાત માટે અમેરિકા પહોંચી ગયા છે. જોકે બેઠક પહેલાં તેમના ડ્રેસને લઈને ચર્ચા શરૂ થઈ ગઈ છે. એક્સિયોસના રિપોર્ટ મુજબ, વ્હાઇટ હાઉસે પૂછ્યું છે કે ઓવલ ઓફિસમાં યોજાનાર આ બેઠકમાં ઝેલેન્સ્કી સૂટ પહેરશે કે નહીં. બેઠકમાં યુરોપના ટોચના નેતાઓ પણ હાજર રહેશે.

અગાઉ માર્ચમાં વ્હાઇટ હાઉસમાં ઝેલેન્સ્કી અને ટ્રમ્પ વચ્ચે થયેલી મુલાકાત દરમિયાન ડ્રેસ કોડ મુદ્દે વિવાદ ઊભો થયો હતો. ત્યારે એક રિપોર્ટરે ઝેલેન્સ્કીને સૂટ ન પહેરવા અંગે સવાલ કર્યો હતો. તેના જવાબમાં ઝેલેન્સ્કીએ કટાક્ષ કરતા કહ્યું હતું કે રશિયા સાથેનું યુદ્ધ પૂર્ણ થયા બાદ જ તેઓ સૂટ પહેરશે.

ઝેલેન્સ્કી અગાઉ ટ્રમ્પ સાથે મળવા માટે સૈનિક ડ્રેસમાં આવ્યા હતા, જે યુક્રેનના યુદ્ધનું પ્રતિક બની ગયું હતું. રિપોર્ટ અનુસાર, આ વખતે તેઓ સૂટ અને ટાઈના બદલે કાળી જેકેટ પહેરવાની યોજના ધરાવે છે, જે બિઝનેસ સ્ટાઈલનો દેખાવ આપે છે. આ બેઠક વોશિંગ્ટન ડીસીમાં યોજાશે અને તેમાં બ્રિટન, જર્મની, ફ્રાન્સ, ઈટાલી, ફિનલેન્ડ તેમજ યુરોપીય સંઘ અને નાટોના ટોચના નેતાઓ પણ જોડાશે.