નેશનલ બોર્ડ ઓફ એક્ઝામિનેશન ઇન મેડિકલ સાયન્સ (NBEMS)એ મેડિકલ વિદ્યાર્થીઓ માટે મહત્વપૂર્ણ અપડેટ જાહેર કર્યું છે. 19 ઓગસ્ટ, સોમવારે, નેશનલ એલિજિબિલિટી કમ એન્ટ્રન્સ ટેસ્ટ-પોસ્ટગ્રેજ્યુએટ (NEET PG 2025)નું પરિણામ સત્તાવાર રીતે જાહેર કરવામાં આવ્યું. ઉમેદવારો હવે બોર્ડની સત્તાવાર વેબસાઇટ natboard.edu.in પર જઈને પોતાનું પરિણામ જોઈ અને ડાઉનલોડ કરી શકે છે.

બોર્ડે જણાવ્યું છે કે 29 ઓગસ્ટથી વ્યક્તિગત સ્કોરકાર્ડ ઉપલબ્ધ થશે, જે ઉમેદવારો ઓનલાઈન ડાઉનલોડ કરી શકશે. નોંધનીય છે કે આ સ્કોરકાર્ડ ફક્ત 6 મહિના માટે માન્ય રહેશે, એટલે પ્રવેશ પ્રક્રિયામાં સમયસર તેનો ઉપયોગ જરૂરી છે.

પરીક્ષા ક્યારે યોજાઈ હતી?
આ વર્ષે NEET PG 2025ની પરીક્ષા 3 ઓગસ્ટે સવારે 9થી બપોરે 12:30 સુધી એક જ શિફ્ટમાં યોજાઈ હતી. દેશભરના 2.42 લાખથી વધુ ઉમેદવારોએ આ પરીક્ષા આપી હતી. આ પરીક્ષા દ્વારા શૈક્ષણિક સત્ર 2025-26 માટે MD, MS, DNB, DNRB અને PG મેડિકલ ડિપ્લોમા કોર્સમાં પ્રવેશ આપવામાં આવશે.

મૂલ્યાંકન પ્રક્રિયા અને નોર્મલાઇઝેશન:
NBEMSએ જણાવ્યું છે કે પ્રશ્નપત્રમાં કોઈ પ્રશ્ન ટેકનિકલી ખોટો નહોતો, તેથી બધા પ્રશ્નોને સાચા માનવામાં આવ્યા છે. અગાઉની જેમ નોર્મલાઇઝેશન પ્રક્રિયા આ વખતે લાગુ કરવામાં આવી નથી, કારણ કે સુપ્રીમ કોર્ટના આદેશ અનુસાર પરીક્ષા માત્ર એક જ શિફ્ટમાં લેવામાં આવી હતી.

તમારું પરિણામ કેવી રીતે તપાસશો?

1. સત્તાવાર વેબસાઇટ nbe.edu.in પર જાઓ.
2. NEET PG ટેબ પર ક્લિક કરો.
3. પરિણામ લિંક ખોલો અને PDF ડાઉનલોડ કરો.
4. અરજી નંબર શોધો અને ભવિષ્ય માટે સેવ કરો.