અમેરિકાના ભૂતપૂર્વ રાષ્ટ્રપતિ ડોનાલ્ડ ટ્રમ્પે ગઇકાલે વ્હાઈટ હાઉસમાં યુક્રેનના પ્રમુખ વોલોદીમિર ઝેલેન્સ્કી અને યુરોપના અનેક નેતાઓ સાથે બેઠક કરી. આ બેઠકનો મુખ્ય ઉદ્દેશ યુક્રેન-રશિયા યુદ્ધને સમાપ્ત કરવાના રસ્તાઓ શોધવાનો હતો. બેઠક બાદ કોઈ અંતિમ નિર્ણય લેવામાં આવ્યો ન હોય, છતાં બધાં નેતાઓએ આશાજનક નિવેદનો આપ્યા છે. ટ્રમ્પે કહ્યું કે તેઓ યુદ્ધ સમાપ્ત થવાની શક્યતા અંગે આશાવાન છે.

ટ્રમ્પે વધુમાં ખુલાસો કર્યો કે નજીકના ભવિષ્યમાં રશિયન પ્રમુખ પુતિન અને યુક્રેનના પ્રમુખ ઝેલેન્સ્કી વચ્ચે પણ બેઠક યોજાશે. તેમણે એ પણ જણાવ્યું કે કોઈપણ પૂર્વ શરત વિના પુતિન સાથે વાતચીત જરૂરી છે અને યુદ્ધ સમાપ્ત કરવા માટે બધા પાસાંઓને વિચારવા આવશ્યક છે. ટ્રમ્પે સંકેત આપ્યા કે અમેરિકા યુક્રેનને સુરક્ષા અંગે કેટલીક ગેરંટી આપી શકે છે.

અલાસ્કામાં 15 ઓગસ્ટે ટ્રમ્પ અને પુતિનની મુલાકાત થઈ હતી. તેની પાશ્વભૂમિમાં હવે ટ્રમ્પે જણાવ્યું કે “ફોન પર પુતિન સાથે મારી વાતચીત થઈ છે અને અમે ત્રણેય વચ્ચે (ટ્રમ્પ, પુતિન અને ઝેલેન્સ્કી) ત્રિપક્ષીય બેઠક માટે સ્થળ નક્કી કરી રહ્યા છીએ. આ ચાર વર્ષથી ચાલતા યુદ્ધને અંત આપવાનો મહત્વપૂર્ણ પ્રયાસ હશે.”

વ્હાઈટ હાઉસની બેઠકમાં ઝેલેન્સ્કી ઉપરાંત ફ્રાંસના પ્રમુખ ઇમાન્યુઅલ મેક્રોન, ઇટાલીની વડાપ્રધાન જોયર્જિયા મેલોની, યુકેના વડાપ્રધાન કિઅર સ્ટાર્મર અને જર્મન ચાન્સલર મર્જ પણ ઉપસ્થિત રહ્યા હતા. આ બેઠકને આંતરરાષ્ટ્રીય રાજકીય વર્તુળોમાં શાંતિ સ્થાપનાની દિશામાં મોટા પગલાં તરીકે જોવામાં આવી રહી છે.