ભારતમાં હવે ઓનલાઈન સટ્ટાબાજી દંડનીય ગુનો ગણાશે કારણ કે લોકસભામાં ઓનલાઈન ગેમિંગ બિલ પસાર કરવામાં આવ્યું છે. આ બિલના અમલથી સટ્ટાને પ્રોત્સાહન આપતી એપ્લિકેશન્સ અને તેનું માર્કેટિંગ કરનાર સેલિબ્રિટીઓ સામે કાર્યવાહી સરળ બનશે. હાલ દેશભરમાં આશરે 22 કરોડ યુઝર્સ ઓનલાઈન સટ્ટાબાજી એપ્સનો ઉપયોગ કરે છે, જેમાંથી લગભગ 11 કરોડ યુઝર્સ નિયમિત રીતે તેનો ઉપયોગ કરે છે.

ઇલેક્ટ્રોનિક્સ અને આઈટી મંત્રી અશ્વિની વૈષ્ણવે લોકસભામાં આ બિલ રજૂ કરતા જણાવ્યું કે, ગત 11 વર્ષમાં ડિજિટલ ટેક્નોલોજીનો ઝડપથી પ્રસાર થયો છે, જેના કારણે દેશની નવી ઓળખ બની છે અને સ્ટાર્ટઅપ ઇકોસિસ્ટમ પણ આગળ વધ્યો છે. તેમણે જણાવ્યું કે ગેમિંગ સેક્ટરમાં ત્રણ મુખ્ય સેગમેન્ટ છે – ઇ-સ્પોર્ટ્સ, ઓનલાઇન સોશિયલ ગેમ્સ અને ઓનલાઇન મની ગેમ્સ. જ્યાં ઇ-સ્પોર્ટ્સ અને સોશિયલ ગેમિંગ શૈક્ષણિક તથા સ્ટ્રેટેજિક થિંકિંગ વધારવામાં મદદરૂપ છે, ત્યાં ઓનલાઇન મની ગેમ્સ સમાજ માટે ગંભીર ચિંતાનો વિષય બની ગયા છે.

વૈષ્ણવે જણાવ્યું કે અનેક લોકો ઓનલાઈન મની ગેમ્સના કારણે એડિક્શનનો શિકાર બન્યા છે, પોતાની જીવનભરની કમાણી અને બચત ગુમાવી દીધી છે. આ ગેમ્સમાં ફ્રોડ, ચીટિંગ અને ઓપેક અલ્ગોરિધમ્સના કારણે હાર નક્કી થઈ જાય છે. કર્ણાટકમાં માત્ર 31 મહિનામાં 32 સુસાઇડના કેસ નોંધાયા છે, જેનાથી સ્થિતિની ગંભીરતા સ્પષ્ટ થાય છે. ઉપરાંત મની લોન્ડ્રિંગ અને ટેરર ફંડિંગ જેવા જોખમો પણ આ ક્ષેત્ર સાથે જોડાયેલા છે. વિશ્વ સ્વાસ્થ્ય સંગઠન (WHO)એ પણ ઓનલાઈન ગેમિંગ ડિસઓર્ડરને નવી બીમારી તરીકે જાહેર કરી છે.

આ બિલ મુજબ ઇ-સ્પોર્ટ્સ અને સોશિયલ ગેમિંગને પ્રોત્સાહન આપવાના આયોજન સાથે ઓથોરિટી રચાશે, જ્યારે ઓનલાઇન મની ગેમ્સ પર કડક નિયંત્રણ રહેશે. કેન્દ્ર સરકારે મધ્યમ વર્ગ અને સમાજના હિતને ધ્યાનમાં રાખીને આ પગલું ભર્યું છે. જો કે, વિપક્ષના હોબાળાના કારણે ચર્ચા વગર આ બિલ ધ્વનિમતથી પસાર કરાયું છે અને લોકસભાની કાર્યવાહી 21 ઓગસ્ટ સુધી સ્થગિત કરવામાં આવી છે.