મધ્યપ્રદેશના ખંડવા જિલ્લામાં એક અનોખી ઘટના સામે આવી છે, જ્યાં નર્મદા જળ સપ્લાય માટે નાખવામાં આવેલી પાઈપલાઈન વારંવાર ફાટવાના કારણે હવે ગિનિસ બુક ઓફ વર્લ્ડ રેકોર્ડમાં નામ નોંધાવવાની તૈયારી થઈ રહી છે. આશ્ચર્યજનક બાબત એ છે કે 106 કરોડ રૂપિયાની આ પાઇપલાઈન અત્યાર સુધીમાં લગભગ 450થી વધુ વખત ફાટી ચૂકી છે, જેના કારણે નાગરિકોને વારંવાર પાણીની તંગીનો સામનો કરવો પડ્યો છે.

નગર નિગમના વિપક્ષ નેતા અને કોંગ્રેસના કોર્પોરેટર દીપક મુલ્લુ રાઠોડે માહિતી આપતા જણાવ્યું કે તેમણે આ મામલો ગિનિસ બુકમાં નોંધાવવા માટે અરજી કરી હતી, જે સ્વીકારવામાં આવી છે. ગિનિસ બુકે રેકોર્ડ નોંધાવવા માટે પ્રમાણિત દસ્તાવેજોની માંગણી કરી છે. રાઠોડે કહ્યું, “આ પ્રોજેક્ટ ભ્રષ્ટાચારનું જીવતું ઉદાહરણ છે. દુનિયામાં કોઈ પરિયોજના આટલી ખરાબ રીતે નિષ્ફળ ગઈ નથી.”

ખંડવાની 2.5 લાખ વસ્તીને પાણી પૂરવઠો પૂરો પાડતી આ પાઈપલાઈન તૂટવાથી અનેક વખત પાણી પુરવઠો 48 કલાક સુધી બંધ રહેવાનો પ્રસંગ આવ્યો હતો. જોકે, અધિકારીઓએ ખાતરી આપી છે કે નવી પાઈપલાઈન નાખવાનું કામ લગભગ પૂર્ણ થઈ ગયું છે, જેનાથી ભવિષ્યમાં નાગરિકોને રાહત મળશે.