અમેરિકાના રાષ્ટ્રપ્રમુખ ડોનાલ્ડ ટ્રમ્પ અને યુક્રેનના રાષ્ટ્રપ્રમુખ વ્લોદિમીર ઝેલેન્સ્કી વચ્ચે બેઠક યોજાયા બાદ રશિયાના વિદેશ મંત્રી સર્ગેઈ લાવરોવે યુરોપિયન દેશોને કટાક્ષ કર્યો છે. ઝેલેન્સ્કી યુરોપિયન દેશોના નેતાઓ સાથે મુલાકાત કર્યા બાદ અમેરિકા પહોંચી અને ટ્રમ્પ સાથે ચર્ચા કરી હતી. ત્યારબાદ ટ્રમ્પે ત્રિપક્ષીય બેઠક યોજવાનું આશ્વાસન આપ્યું હતું.

અલાસ્કામાં ટ્રમ્પ અને રશિયાના રાષ્ટ્રપ્રમુખ વ્લાદિમીર પુતિન વચ્ચે થયેલી બેઠકની ચર્ચા કરતા લાવરોવે કહ્યું કે ટ્રમ્પ લાંબા ગાળાની શાંતિ સમજૂતી કરવા ઈચ્છે છે જ્યારે યુરોપિયન દેશો માત્ર યુદ્ધવિરામની વાતો કરે છે. તેમણે કહ્યું, “ટ્રમ્પ અને તેમની ટીમ ઈમાનદારીથી યુદ્ધ અટકાવવાનો પ્રયાસ કરી રહી છે અને તેઓ ટકાઉ, વિશ્વસનીય સમાધાન ઈચ્છે છે.”

લાવરોવે આક્ષેપ કર્યો કે યુરોપિયન દેશો શાંતિ કરતાં યુદ્ધવિરામને પ્રાધાન્ય આપે છે જેથી તેઓ યુક્રેનને હથિયારો પૂરા પાડતા રહી શકે. તેમણે ટ્રમ્પ અને ઝેલેન્સ્કીની બેઠક અંગે જણાવ્યું કે ટ્રમ્પે સ્પષ્ટ કહ્યું છે કે રશિયા-યુક્રેન વચ્ચે શાંતિ સમજૂતી થઈ શકે છે અને યુદ્ધવિરામની જરૂર નથી.