BCCIના બ્રોડકાસ્ટ એન્જિનિયરનું મુંબઈમાં રહસ્યમય મોત, હોટલના રૂમમાંથી મળી આવ્યો મૃતદેહ

BCCI Broadcast Engineer Dies Suspiciously In Mumbai: IPL 2026નો રોમાંચ ચાલી રહ્યો છે. પરંતુ આ વચ્ચે એક ખરાબ સમાચાર સામે આવ્યા છે. IPL મેચો માટે BCCI સાથે બ્રોડકાસ્ટ એન્જિનિયર તરીકે કામ કરતા એક બ્રિટિશ નાગરિક મુંબઈની ટ્રાઈડેન્ટ હોટલના રૂમમાં મૃત હાલતમાં મળી આવ્યા છે. મૃતકની ઓળખ ઈયાન વિલિયમ્સ લેંગફોર્ડ તરીકે થઈ છે.

BCCIના બ્રોડકાસ્ટ એન્જિનિયરનું મુંબઈમાં રહસ્યમય મોત

પ્રાપ્ત માહિતી પ્રમાણે ઈયાન 24 માર્ચથી મુંબઈની ટ્રાઈડેન્ટ હોટલમાં રોકાયા હતા અને IPL મેચ કવરેજ સાથે સબંધિત કામ કરી રહ્યા હતા. 29 માર્ચે મેચ સમાપ્ત થયા પછી તેઓ પોતાના રૂમમાં પરત ફર્યા હતા. બીજા દિવસે 30 માર્ચે હોટલ રિસેપ્શન તરફથી તેમને ફોન કરવામાં આવ્યો, પરંતુ તેમના રૂમમાંથી કોઈ જવાબ ન મળ્યો. ત્યારબાદ હોટેલ સ્ટાફ તેમના રૂમમાં ગયો. જ્યારે અંદરથી કોઈ જવાબ ન મળ્યો ત્યારે તેઓએ માસ્ટર કીનો ઉપયોગ કરીને રૂમ ખોલ્યો.

રૂમની અંદર ઈયાન ફ્લોર પર પડેલા મળા આવ્યા. તાત્કાલિક હોટલના ઈન-હાઉસ ડૉક્ટરને બોલાવવામાં આવ્યા, જેમણે તપાસ બાદ તેમને મૃત જાહેર કર્યો. ઘટનાની માહિતી મળતાં જ મરીન ડ્રાઈવ પોલીસ ઘટનાસ્થળે પહોંચી ગઈ. પોલીસે કેસ નોંધી લીધો છે અને મોતના કારણોની તપાસ કરી રહી છે. પોલીસ હાલમાં પોસ્ટમોર્ટમ રિપોર્ટની રાહ જોઈ રહી છે, ત્યારબાદ મૃત્યુનું ચોક્કસ કારણ સ્પષ્ટ થશે. 

આ પણ વાંચો: સુરતમાં અગ્નિકાંડ: લિંબાયતમાં ઘરમાં રાખેલા સાડીના કામના કેમિકલમાં બ્લાસ્ટ બાદ ભીષણ આગ, 5 લોકોના મોત

મુંબઈ ઈન્ડિયન્સની શાનદાર જીત

તમને જણાવી દઈએ કે,29 માર્ચે મુંબઈના વાનખેડે સ્ટેડિયમ ખાતે મુંબઈ ઈન્ડિયન્સ અને કોલકાતા નાઈટ રાઈડર્સ વચ્ચે મેચ રમાઈ હતી. મુંબઈ ઈન્ડિયન્સે આ મેચમાં શાનદાર જીત હાંસલ કરી હતી. આ મેદાન પર આ સીઝનની પહેલી IPL મેચ હતી. જ્યાં મોટી સંખ્યામાં દર્શકો પહોંચ્યા હતા.